إحترت أبدأ تعريفاتي النهاردة منين؟ !
على العموم أهي البلاوي كتيرة وخلينا نبدأ بالليبرالية :
والليبرالية في معناها الجميل تدعو إلى الحرية وكل واحد حر يعمل اللي هوا عايزه طالما مقتنع بيه وطالما مابيضرش حد بيه والدولة تساعد الأفراد على إن كل واحد يشطح بخياله ويطلع تفانين يستمتع فيها بحريته وأجدع واحد ليبرالي هوا اللي يطلع بفكرة جديدة وتكون خارجه على المألوف زي إنه يقلع هدومه مثلا ويقعد في وسط الإستاد (ماهو حر بقى) !!! وطبعا هوا مبيضرش حد (لو مش عايز تشوفه إمشي مغمض ولا ما تبصش يا أخي !!!! وحتى برضه لو شتم الأنبياء وتمرد على الأديان !!! ماهو حر في دينه برضه ومعتقداته والدولة يجب إنها تمنع الناس من إنها تضربه أو تحرقه أو تولع فيه بجاز !!!
الإمبريالية بقى قبل ما أنسى هيا إنك تعمل إمبراطورية وتعملك جيش حلو كده هدفه إنه يروح يستقوى على الدول الضعيفه اللي معندهاش جيش ولا جيشها تعبان وعلى قده (ماهو بيقولك اللي مالوش ظهر بيضرب على بطنه) والعساكر بتوعك يقعدوا هناك وتسميهم الحاكم العسكري ووظيفة الحاكم العسكري إنه يلمك الفلوس والقمح والبترول وإي حاجه غالية في البلد دي ويبعتهالك على لندن ... أصل ده كان نظام بريطانيا زمان...وأمريكا بتعمل كده دلوقتي بس أحيانا مابتكونش محتاجه عساكر ولا دبابات إنما بنظام عبقري حلو خالص إسمه الرأسمالية وده هنشرحه في الأخر ...
أما العلمانية فمعناها الصافي إنك تعبد ربنا زي مانت عايز وعلى كيفك محدش بيغلطك في كده بس مالكش دعوة بالسياسه .... عشان الجماعه الساسه دول ملحدين مثلا ومش عايزين حد يفكرهم بربنا ولا يجيب سيرته ... يعني مثلا طالع تلقي خطاب في التلفزيون ماتقولش بسم الله ... قول مثلا بسم الوطن ... أو حتى بسم المحبه ... أو بسم الكتكوت الشركسي لكن ماتجيبش سيرة ربنا قال ولا الرسول قال قدام الناس عشان ما تخوفهمش ولا تخضهم
عايز تصلي؟ ... صلي! ... في بيتك ولا حتى ماشي نعملكم جوامع وكنايس كمان تصلوا فيها زي مانتوا عايزين ... لكن تطلع بره الجامع وتكلم في الدين فاهوا ده العيب بعينه !!!!
تجيلي بقى يا باشا على الإشتراكية: وأول مبدأ في الإشتراكية هوا الشيوعية ... وأول حاجه في الشيوعية إنه لا إله ... مش لا إله إلا الله زي ما بنقول ..... وإنما لا إله خالص !!!! يعني تبقى فله ... وبعد كده بقى الدولة هتصرف عليك وتشغلك وتعلمك وكل حاجه زيك زي باقي زمايلك واللي هيجرى على الشعب يجرى عليك وتخليك في حالك وتعيش وتموت وتقضي يومينك وخلاص وما تكترش في الكلام والإستفهامات؟؟؟ حتى لما تلاقي الشيوعية إنهارت في روسيا لازم تبقى فاهم إن الخطأ مكانش في الشيوعية كمبدأ وإنما في التطبيق!!!!
على فكرة البرجوازية تبقى بنت عم الإشتراكية وهيا عبارة عن إن فيه ناس مهمشة لازم تشارك في الحكم زي الزبالين والكناسين ... إيه مالك؟ ولا دول مش ناس يعني؟ ولا يكونوش مش ماليين عينك؟ !!!
والبرجوازيين دول هما اللي عملوا الثورة في فرنسا قبل كده.....
خوشلي بقى على الجماعات الإسلامية ...ودي طوائف مختلفة ومتناحرة ويكفر بعضها بعضا أحيانا ! والصراحه ماتقدرش تعرف بالظبط أنهي جماعة هما اللي صح والباقي هما اللي هجاصين ..... وماينفعش فيها التعميم ... كل واحد عنده فكره اللي هوا فيه له أصول طبعا وأسنده ومرجعيات ... زي السلفيه والوهابية والإخوانية والخلافيه والكلامية والمعتزلة والمرجئة وكتييير بقى قول زي مانت عايز ... المهم أنا هفرض وصايتي عليك وهاحددلك هاتلبس ملابس داخلية من أنهي نوع وتصلي في أنهي زاوية وتسمع خطبة الجمعه للشيخ مين وماتسمعش لمين وتعيد يوم إيه ولما تيجي في رمضان تفطر إيه وكله بالدين برضه ماهو الدين بيقولك تطيع الحاكم طالما أمرك بما لا يغضب الله ... المهم هاتحكم فيك وهاطلع عقدي عليك وهابهدلك خالص ومش هاتقدر تفتح بقك ولا عينيك ولا حاجه خالص والا هاتكون بتجادل (يا أخ علي) وهاتكون بتعض في الحاكم وبتعارضه ودا طبعا هيكون ليلة أبوه سودا ومحدش هيقدر يدافع عنه ....
ولو حبيت تكون معتدل تمشي في سكة الوطنية الديموقراطية ... ودي اللي القذافي شرح معناها كويس : ساعة لما كان بيقول إنها جاية من مقطعين " ديمو" وكراسي" يعني ديموكراسي ... يعني تفضل قاعد على كرسييك دايما ... وكان فيه حزب في مصر متسمي بالأسم ده ... بس مش عارف اللي هيعوز يمشي في السكة دي تاني هيسموها إيه بعد كده بالظبط !!!! والحزب اللي هيطلع جديد لغاية ما هيسموه أقدر أقولك إنه عايز يشارك في الحكم بس عشان يعمله قرشين ويستنفع ويقول إي كلام جميل في إي وقت حلو في إي حتة لطيفة ويضحك على الناس ... يعني هوا ده النصب بعينه أو اللي بيسموه الإحتيال .... تمام كده زي ما تسمي الخمرة بإسم مشروبات روحية ... وخلي بالك روحية دي إتجوزت وبنقول روحية غير روحانية وخلي بالك قوي ...
وبمناسبة القذافي فالراجل بعد لما لقى التيارات السياسية في العالم دي كلها سوداء ومتهببة بهباب قرر يعمل نظام سياسي جديد وسماه اللجان الشعبية .... يعني الشعب يحس برضه إنه بيحكم ... هوا صحيح فيه واحد ديكتاتور اللي بيحكم فعلا وبيصدر كل القرارات وبيؤلف الكتاب الأخضر ... لكن أهو ولو حتى في الظاهر فيه شوية ناس من الشعب بتحاول تحكم (يعني بتحاول تفهم إيه الكلام اللي في الكتاب الأخضر ده وتنفذه)!!!!
أما الملكية فهيا إن فيه واحد بس البلد كلها بتاعته ... وارثها أبا عن جدا والبلد بمعنى كل حاجه ... يعني الأرض والمباني اللي عليها وكمان الناس اللي ساكنين على أرضه دول اللي هما المواطنين يعني ... يعني إنته ... ومراتك ... وعيالك ... وعربيتك وكل هدومك ... دي في الأصل حاجة الملك بس هوا من كرم أخلاقه بيتعطف عليك وبيسيبك تستخدمهم ومافيش مانع كل شوية يديك منحه ملكية ولا هبة ولا إي حاجه زي الشحاتين كده وطبعا هوا مش بيصرف عليك غير من دخل البلد كله اللي لازم يدخل خزنته الأول وبعد كده هوا يشوف يطلع إيه ويخلي إيه؟؟؟
والفرق بين الملكية والجمهورية إن الملك الجديد إبن الملك القديم (وأحيانا بنته) ودا شيئ عادي بدون خنافات .... إنما بقى في الجمهورية لازم الرئيس يبذل شوية مجهود زيادة حبتين عشان يقنع الشعب بإن إبنه هوا أحسن رئيس وأحيانا لما الشعب بيكون تعبان ولا ضايع مابتكونش مهمة الرئيس دي صعبة ولا حاجه.... أهو نظام كده شبه البجاحه وعلى عينك يا تاجر !!!
متهيألي هيطلع بعد كده حزب إسمه ساداتي ... وده تسمية مقترحه أسوة بالحزب الناصري وحزب الوفد بتاع سعد زغلول (الله يرحم موتانا وموتاكم جميعا)
لو تحب تتعمق شوية وتعرف إيه الفرق بين اليسار واليمين ... فلازم تعرف إن الموضوع ده له أصول تاريخية من أيام الرومان والأغريق ويمكن الفراعنه كمان (ولو إن الفرعون مكانش بيقعد حد معاه إنما ماشي) ....
بيقولك يا باشا إن مجلس كده زي مجلس الشعب بتاعنا دلوقتي كانوا بيقعدوا في .... (حتة حلوة كده فيها كراسي طوب ) ليها إسم بالإغريقي بس مش فاكره دلوقتي ....متهيألي (بازيليكا؟) المهم اللي كان بيقعد على اليمين دول كانوا مجموعة بتحب الناس القدام وأرائهم (اللهم أجعلنا من أهل اليمين يا رب) !!! بيقولك عليا اليمين .... لو كنت فاهم حاجه
أما بقى الجماعة اللي كانوا بيقعدوا على الشمال ... اللي هوا اليسار يعني ... فبيسموهم يساريين .... ودول يا باشا مكانوش بيحبوا الجماعة القدام فعشان كده كانوا بيحبوا يألفوا كلام جديد
تمام كده زي اللي بيحب عبد الوهاب وعبد الحليم وفريد وأم كلثوم ... الله يرحم موتانا جميعا ... وبيقولوا عليهم الطرب الأصيل فعشان كده سموهم المحافظين ... وعلى فكرة حزب المحافظين ده هوا اللي بيحكم ... وحزب اليسار (زي مافي بريطانيا كده) بيقعد يناكف فيه ويقولهم لأ عندنا أفكار جديدة وبنحب عمرو دياب وتامر حسني وما بنطيقش نسمع أم كلثوم خالص !!!
أنا كل اللي أعرفه عن المحافظين دول إن إبن أخو محافظ الجيزة كان معانا في الكلية بيدرس بس الكلام ده كان زمان....
وعشان تبقى يساري لازم ما تلبسش بدلة (لأن كل ده موضه قديمة) إنما تضربلك بنطلون قصير وتزقه لتحت لغاية مايبقى عند ركبتك كده وتلبس فانلة طويلة عشان تحاول تستر بيها نفسك وماتنساش تخليها واسعة شوية عشان لما الهوا يجي ويرفعها حبتين تقوم مبينة إنك منزل البنطلون وعلى العموم حتى لو مجاش هوا فمش مشكلة حاول من وقت للتاني إنك تبين إنك بتحاول ترفع البنطلون لفوق عشان تبين للناس إنك برضه إسمك بتكسف ... أما شعرك بقى تدلق عليه نصف علبة جيل وترفعه لفوق من النص وتكتب عليه سهم وتشاور إن قصة الشعر دي إسمها سبايك....
على حتة شنطة لاب توب (ممكن تبقى فاضيه) وإي حاجه لونها غريب شوية تلبسها في ودنك أو في إيدك أو في إي حتة تعجبك وتقول إي كلام وتعمل نفسك منفعل كده ومتضايق ... وأهو حالك هيمشي لأن لازم في البلد يكون فيه حزب إسمه اليسار ... وهنجيبله ناس منين ده !!! وهيسموك من المجددين .... (ربنا يجازيك يا فاروق) :)))
وأخر حاجه أحب أختتم بيها تعريفاتي النهارده هيا الرأسمالية .... وهوا لسه بصراحه القذافي ما أدلاش برأيه في القضية بس كل اللي أقدر أقولهلكم دلوقتي إن الرأسمالية دي عبارة عن إن اللي معاه قرش يسوى قرش وإن القرش الأبيض ينفع في اليوم الإسود ... وإن ماياخدش باله من قرشه يبقى مابياخدش باله من نفسه ... ومن الأخر اللي هيحكم هما رجال المال والإقتصاد عشان هما بيفهموا كويس في الإستثمار ... وإنك لازم تشتغل عندهم زي الثور اللي مربوط في الساقية كده بالظبط ولو في يوم مليت ولا كليت مش هتلاقي حد يسندك يا معلم!!!!
إختارلك إنته بقى نظام الحكم اللي يناسبك بعد مافهمت الليلة الأنس دي ....!!!!
